លោក Deepak Chopra ដែលវេជ្ជបណ្ឌិតជោគជ័យ អ្នកនិពន្ធ និងជាអ្នកដឹកនាំផ្នែកគំនិតលំដាប់ថ្នាក់ពិភពលោកបានផ្តល់ដំបូន្មានទាក់ទងនឹងរបៀបដែលសហគ្រិនអាចទទួលបានសេរីភាពផ្លូវចិត្តដើម្បីជោគជ័យក្នុងមុខជំនួញដូចខាងក្រោមនេះ៖
១/ សួរខ្លួនឯងថាហេតុអ្វីបានជាខ្ញុំចង់ធ្វើជំនួញ?
មុននឹងសម្រេចចិត្តជ្រើសអាជីពអ្វីមួយមនុស្សម្នាក់ៗគួរតែសួរខ្លួនឯងថា តើខ្ញុំជានរណា? តើខ្ញុំចង់បានអ្វីពិតប្រាកដ? តើគោលដៅរបស់ខ្ញុំជាអ្វី? តើខ្ញុំធ្វើវិភាគទានអ្វីខ្លះដល់សង្គម? តើខ្ញុំមានមនុស្សជាគំរូដែលអាចរៀនសូត្រពីដំណើរជីវិតរបស់គេបានទេ?
២/ កំណត់ទស្សនវិស័យដើម្បីជោគជ័យ
ដើម្បីកំណត់ឱ្យដឹងទស្សនវិស័យ ឆន្ទៈ និងការជំរុញចិត្តក្នុងពាណិជ្ជកម្ម លោកអ្នកត្រូវចាប់ផ្តើមសួរខ្លួនឯងថា តើអ្វីទៅជាកត្តាជំរុញទឹកចិត្តពិតប្រាកដរបស់ខ្ញុំក្នុងការចាប់ផ្តើមមុខជំនួញ? តើជោគជ័យក្នុងពិភពអាជីវកម្មមានន័យអ្វីដល់ជីវិតរបស់ខ្ញុំ?
៣/ គិតដល់មនុស្សដែលលោកអ្នកចង់ធ្វើការជាមួយគ្នា
សួរខ្លួនឯងថាតើក្រុមបែបណាដែលខ្ញុំចង់ដឹកនាំ? តើខ្ញុំអាចបង្កើតក្រុមការងារមួយដែលមានទស្សនវិស័យរួម និងគុណតម្លៃដូចគ្នាបានដោយរបៀបណា? តើខ្ញុំអាចបង្កើតកម្លាំងចិត្តសមាជិកក្រុមការងារបានដោយរបៀបណា? គិតរកមធ្យោបាយដែលលោកអ្នកអាចមានចំណងមនោសញ្ចេតនាជាមួយនឹងក្រុមការងារ ព្រោះថាលោកអ្នកតែម្នាក់ឯងមិនអាចធ្វើអ្វីបានទាំងអស់ទេ។
៤/ កុំមានចិត្តជាប់ជំពាក់នឹងលទ្ធផលការងារ
កុំគិតដល់លទ្ធផលពេក តែត្រូវគិតផ្តោតលើដំណើរការជាក់ស្តែងឱ្យបានច្រើន។ ប្រសិនបើលោកអ្នកមិនរីករាយចំពោះការងារដែលកំពុងតែធ្វើទេ លោកអ្នកក៏មិនអាចសប្បាយចិត្តចំពោះលទ្ធផលការងារបានដែ។ រូបមន្តដែលគួរតែចងចាំគ្រប់ពេលគឺព្យាយាមសម្រេចឱ្យបាននូវឧត្តមភាព ហើយព្រងើយកន្តើយចំពោះជោគជ័យ។
៥/ បង្កើតគោលដៅ និងកំណត់ពេលវេលាដើម្បីសម្រេចគោលដៅ
ពិនិត្យផ្ទៀងផ្ទាត់ជាមួយនឹងក្រុមការងារលោកអ្នកដើម្បីឱ្យដឹងច្បាស់ថាអ្វីទៅជាគោលដៅពិតរបស់មុខជំនួញលោកអ្នក។ សាកសួរក្រុមការងារតើគេទាំងអស់គ្នាយល់ព្រមចំពោះពេលកំណត់ដើម្បីសម្រេចគោលដៅនោះដែរឬទេ? តើគោលដៅនោះមានភាពប្រាកដនិយមទេ? តើលោកអ្នកប្រឹងប្រែងហួសសមត្ថភាពនិងលទ្ធភាពទេដើម្បីតោងចាប់គោលដៅនោះ?
៦/ ស្គាល់ឱ្យច្បាស់នូវអ្វីដែលថ្មី
មនុស្សជាច្រើនក្នុងពិភពជំនួញមិនសូវគិតគូរដល់កិច្ចការថ្មីឬចាស់ មុខរបរមានស្រាប់ ឬបង្កើតថ្មីនោះទេ។ លោកអ្នកមិនអាចមានថ្កុំថ្កើងយូរអង្វែងដោយគ្រាន់តែធ្វើត្រាប់តាមគេនោះទេ។ ដើម្បីសម្រេចបានភាពជាសហគ្រិនលេចធ្លោ លោកអ្នកត្រូវគិតថាតើអ្វីដែលខ្ញុំប្រុងនឹងធ្វើនេះពិតជាកិច្ចការថ្មីដែលគ្មានអ្នកដទៃធ្វើទេមែនទេ?
៧/ មើលបញ្ហាឱ្យឃើញជាឱកាស
ការរិះគន់ ឬដើរតួជាជនរងគ្រោះនៃស្ថានការណ៍អ្វីមួយមិនមានប្រយោជន៍ទេ ហើយក៏ជាឧបសគ្គចំពោះជោគជ័យដែរ។ មិនខ្វល់ថាលោកអ្នកស្ថិតនៅក្នុងស្ថានភាពបែបណាទេ ត្រូវកំណត់រកចំណុចវិជ្ជមាននិងដើរទៅមុខជាដរាប។ លោកអ្នកបង្កើតសំណាងខ្លួនឯងនៅពេលមានបញ្ហាហើយលោកអ្នកឃើញវាជាឱកាស។ នៅពេលធ្វើបែបនេះបាន លោកអ្នកកំពុងតែស្ថិតនៅលើមាគ៌ាឆ្ពោះទៅរកជោគជ័យហើយ៕
ប្រភព ៖ Entrepreneur
0 comments:
Post a Comment