ប្រសិនបើលោកអ្នកមិនអាចអត់ធ្មត់ចំពោះហានីភ័យដែលនឹងកើតឡើងមុនពេលឈានទៅដល់ចំណុចជោគជ័យ មានន័យថាលោកអ្នកមិនទាន់បានត្រៀមខ្លួនរួចរាល់ដើម្បីចាប់ផ្តើមអាជីវកម្មផ្ទាល់ខ្លួននៅឡើយទេ។ ជាការពិតដែលមនុស្សយើងភាគច្រើនចង់ក្លាយខ្លួនជាសហគ្រិន ប៉ុន្តែនៅតែមានភាពស្ទាក់ស្ទើរស្តាយសុវត្ថិភាពនៃប្រាក់ខែដែលបានធ្វើការឱ្យគេ។ ខាងក្រោមនេះជាសញ្ញាទាំង៤ដែលបញ្ជាក់ថាលោកអ្នកនៅតែជានិយោជិត ហើយមិនទាន់ត្រៀមខ្លួនដើម្បីក្លាយជាសហគ្រិននៅឡើយ៖
១/ ត្រូវការទិសដៅច្រើនជាការសម្រេចចិត្ត
និយោជិតទទួលការផ្តល់ទិសដៅពីថ្នាក់លើ។ ពេលទទួលបានការងារថ្មី និយោជិតក៏ទទួលបានបរិយាយការងារដែលប្រាប់គេអំពីម៉ោងពេល និងរបៀបធ្វើការ។
ផ្ទុយទៅវិញសហគ្រិនរៀបចំពេលវេលាធ្វើការដោយខ្លួនឯង និងសម្រេចដោយខ្លួនឯងថាត្រូវធ្វើការរបៀបណា។ គេបង្ហាញវត្តមានចំពោះការងារគ្រប់ពេល ហើយគេមិនត្រឹមតែប្តេជ្ញាចិត្តចំពោះកិច្ចការខ្លួនឯងប៉ុណ្ណោះទេ ប៉ុន្តែក៏គិតផ្តល់របៀបធ្វើការដល់មនុស្សដទៃទៀតក្នុងក្រុមហ៊ុនដែរ។
២/ ត្រូវការរង្វាន់ជាជាងហានីភ័យ
និយោជិតចង់បានការផ្តល់រង្វាន់លើកទឹកចិត្ត។ គេចង់ធ្វើកិច្ចការនិងទទួលបានប្រាក់លើកទឹកចិត្តដោយមិនខ្វល់ពីអ្វីទាំងអស់។
ចំណែកសហគ្រិនវិញហ៊ានប្រថុយប្រថានចំពោះការមិនបានទទួលប្រាក់លើកទឹកចិត្តអ្វីទាំងអស់ដើម្បីធ្វើយ៉ាងណាឱ្យបុគ្គលិកក្នុងក្រុមហ៊ុនទទួលបានប្រាក់កម្រៃសមតាមកិច្ចប្រឹងប្រែងរបស់ពួកគេ។
៣/ គិតដល់សុវត្ថិភាពជាជាងការផ្លាស់ប្តូរ
និយោជិតធ្វើការដែលផ្តល់ប្រយោជន៍និងប្រាក់ខែល្មមគ្រប់គ្រាន់ដើម្បីទូទាត់ថ្លៃរស់នៅ។ គេក៏ចង់បានប្រាក់ខែក្នុងពេលសុំច្បាប់សម្រាកមួយរយៈដែរ។ ហើយជាទូទៅគេចង់ធ្វើការឱ្យក្រុមហ៊ុនណាដែលមាននិរន្តរភាព។
ចំណែកហសគ្រិនវិញដឹងថាភាពនៅនឹងមួយកន្លែងមិនអាចនៅថេររហូតបានទេ។ គេយល់ថាការផ្លាស់ប្តូរក្នុងទីផ្សារនិងសេដ្ឋកិច្ចអាចនឹងត្រូវការឆ្លើយតបភ្លាមៗ ហើយសហគ្រិនជាច្រើនរីកចម្រើននៅពេលមានការផ្លាស់ប្តូរដែលមើលមិនឃើញបែបនេះព្រោះតែគេដឹងខ្លួនគ្រប់ពេលនៃដំណើរវិវឌ្ឍសេដ្ឋកិច្ច។
៤/ ឆ្លើយតបច្រើនជាងទំនួលខុសត្រូវ
និយោជិតត្រូវតែឆ្លើយតបទៅនឹងបន្ទុកការងារ។ ប្រសិនបើមានអ្វីខុសឆ្គង គេប្រញាប់ចង្អុលកំហុសដាក់ផ្នែកផ្សេងៗ។ ប្រតិកម្មជាបឋមគឺពន្យល់បកស្រាយមូលហេតុដែលនាំទៅដល់លទ្ធផលអវិជ្ជមានបែបនេះ។
ចំណែកសហគ្រិនវិញទទួលយកទំនួលខុសត្រូវនិងការស្តីបន្ទោសទាំងអស់ពេលមានបញ្ហាកើតឡើង។ វាមិនមែនជារឿងងាយស្រួលទេ ហើយក៏ជាពេលដែលអាម៉ាសណាស់ដែរ។ ប៉ុន្តែវាជាការពិតដែលថាសហគ្រិនជាមនុស្សទទួលខុសត្រូវដោយសារគេជាអ្នកតម្រង់ទិសដៅនាវាក្រុមហ៊ុន។
ប្រភព ៖ Entrepreneur
0 comments:
Post a Comment