បុគ្គលិកក្រុមហ៊ុននីមួយៗមិនមែនធ្វើការដល់កម្រិត១០០%គ្រប់ពេលនោះទេ។ ភាគច្រើននៃបុគ្គលិកបម្រើការតាមក្រុមហ៊ុនតូចក្តីធំក្តី ចំណាយពេលខ្លះដើម្បីជជែករឿងផ្ទាល់ខ្លួនគ្រប់មធ្យោបាយទាំងនៅចំពោះមុខគ្នា និងតាមបណ្តាញសង្គម។ សកម្មភាពរំខានទាំងនេះអាចកាត់បន្ថយប្រសិទ្ធភាពនិងផលិតភាពការងារមែន ប៉ុន្តែចោរពិតប្រាកដដែលលួចពេលវេលាច្រើនរបស់ក្រុមហ៊ុនគឺជាទង្វើដែលថ្នាក់ដឹកនាំក្រុមហ៊ុនបង្កើតឡើង និងតម្រូវឱ្យបុគ្គលិកទាំងអស់ចូលរួមទៅវិញទេ។ ខាងក្រោមនេះជាទម្លាប់ប្រចាំថ្ងៃដែលស៊ីពេលវេលាច្រើនរបស់ក្រុមហ៊ុន៖
១/ កិច្ចប្រជុំមិនចាំបាច់
ក្នុងការស្ទង់មតិជាច្រើនកន្លែង បុគ្គលិកចាត់ទុកការប្រជុំជាសកម្មភាពខាតបង់ពេលវេលាធំបំផុតនៅកន្លែងធ្វើការ។ ប្រសិនបើលោកអ្នកជាមនុស្សទទួលខុសត្រូវរៀបចំកិច្ចប្រជុំត្រូវចាំថាលៃយ៉ាងណាប្រជុំតែពេលចាំបាច់ ហើយរបៀបវារៈត្រូវកំណត់ឱ្យច្បាស់លាស់ដើម្បីបញ្ជៀសការជជែកបែកអូរហូរជាស្ទឹងដែលធ្វើឱ្យខាតបង់ពេលវេលាមនុស្សគ្រប់គ្នា។
២/ របាយការណ៍មិនចាំបាច់
របាយការណ៍ដែលលោកអ្នករៀបចំប្រហែលជាសំខាន់សម្រាប់តែខ្លួនលោកអ្នកទេ។ ប្រសិនបើថ្នាក់ដឹកនាំចង់មើលរបាយការណ៍ការងារប្រហែលជាលោកអ្នកគ្មានអ្វីអាចជៀសបានទេ ប៉ុន្តែប្រសិនបើលោកអ្នកគិតតែពីរៀបចំរបាយការណ៍ និងបញ្ជូនទៅមនុស្សគ្រប់គ្នា ប្រហែលលោកអ្នកត្រូវប្រាប់ថ្នាក់ដឹកនាំថាលោកអ្នកគួរតែចំណាយពេលឱ្យបានច្រើនធ្វើកិច្ចការដែលសំខាន់ជាងនេះ។
៣/ របៀបធ្វើការហួសសម័យកាល
សកម្មភាពពាណិជ្ជកម្មនៅតែស៊ីពេលប្រសិនបើលោកអ្នកធ្វើតាមរបៀបដូចកាលពី១០ឆ្នាំមុន។ ឯកសារឬមធ្យោបាយទាក់ទងដែលសរសេរក្រដាសស៊ីពេលច្រើនទាំងពេលរៀបចំ និងពេលទុកដាក់។ សូមក្រឡេកមើលគ្រប់ជ្រុងជ្រោយនៃការងារហើយសួរខ្លួនឯងថាហេតុអ្វីបានជាត្រូវធ្វើការក្នុងរបៀបនេះ។ បន្ទាប់មកសូមស្វែករកមធ្យោបាយល្អជំនួសដើម្បីសន្សំពេល។
៤/ ទំនាក់ទំនងច្រើនពេក
កាលពីសម័យមុន បើបុគ្គលិកត្រូវពិភាក្សាគ្នារឿងអ្វីមួយគេត្រូវតែដើរទៅរកគ្នា ឬនិយាយគ្នាតាមទូរសព្ទ។ ប៉ុន្តែសព្វថ្ងៃនេះប្រព័ន្ធទំនាក់ទំនងមានច្រើនបែបនិងងាយស្រួលណាស់ដើម្បីចែករំលែកគំនិតគ្នា។ ទោះជាយ៉ាងណា និយោជកគួរតែពិចារណាឡើងវិញលើការប្រើប្រាស់ប្រព័ន្ធទំនាក់ទំនងទាំងនេះសម្រាប់តែការពិភាគ្សាចាំបាច់ប៉ុណ្ណោះ ព្រោះមធ្យោបាយទាក់ទងខ្លះច្រើនតែស៊ីពេលឆ្លើយតបសារចុះឡើង។
៥/ ប្រតិកម្មតបទៅនឹងការរំខាន
ក្នុងបរិស្ថានការិយាល័យបើកទូលាយដូចសព្វថ្ងៃនេះ អ្នកធ្វើការងាយនឹងរងការរំខានពីសកម្មភាពរបស់អ្នកជិតខាងណាស់។ ប្រសិនបើអាច សូមរកកន្លែងស្ងប់ស្ងាត់ដើម្បីធ្វើការនៅពេលលោកអ្នកព្យាយាមបង្ហើយកិច្ចការអ្វីមួយ។ បើធ្វើបែបនេះមិនបានទេ សូមចំណាយលុយទិញឧបករណ៍បិទត្រចៀកដែលអាចជួយលោកអ្នកឱ្យព្រងើយកន្តើយនឹងសកម្មភាពរំខានជុំវិញខ្លួនបាន។
៦/ រអ៊ូរទាំនិងនិយាយដើមគ្នា
ការបង្កើតក្រុមគឺជារឿងសំខាន់នៅក្នុងស្ថាប័នការងារ ប៉ុន្តែរាល់ទំនាក់ទំនងរបស់និយោជកគួរតែមានប្រយោជន៍គ្រប់ពេល។ ទោះបីជាពេលខ្លះការរអ៊ូរទាំនិងការនិយាយរឿងគេធ្វើឱ្យយើងសប្បាយភ្លេចខ្លួន តែសកម្មភាពទាំងនេះគ្មានអ្វីចម្រើនទេចំពោះអាជីពលោកអ្នក។ ថ្នាក់ដឹកនាំនឹងយល់ថាលោកអ្នកជាមនុស្សអវិជ្ជមាន ហើយមនុស្សដែលលោកអ្នកកំពុងតែនិយាយដើមនោះនឹងគិតមិនល្អចំពោះលោកអ្នកវិញ ឬអាចឈានទៅរកការមើលមុខគ្នាមិនចំផងក៏មាន៕
ប្រភព ៖ Entrepreneur
0 comments:
Post a Comment