កម្រមានមុខជំនួញណាដែលទទួលបានជោគជ័យដោយងាយៗណាស់។ មិនមែនជារឿងទុទិដ្ឋិនិយមអ្វីទេ ប៉ុន្តែសហគ្រិនភាគច្រើនសុទ្ធតែឆ្លងកាត់ឧបសគ្គរាប់មិនអស់នៅក្នុងដំណើរទៅរកជោគជ័យ។ នេះជាមាគ៌ាតែមួយគត់។ ដើម្បីជម្នះរាល់ឧបសគ្គ និងបន្តដំណើរឆ្ពោះទៅមុខរហូតដល់គោលដៅ លោកអ្នកត្រូវមានសមត្ថភាពអាចកំណត់បញ្ហារំខានជាទូទៅឱ្យបានឆាប់ និងលុបបំបាត់ចោលមុនពេលវារីកធំឡើង។ ខាងក្រោមនេះជាចំណុចមួយចំនួនដែលគួរពិចារណា៖
១/ ស្តាប់មនុស្សច្រើនពេក
ពេលខ្លះសហគ្រិនដែលវៃឆ្លាត និងមានមហិច្ឆតាធំ មានគំនិតរាប់មិនអស់បែរជាត្រូវរាំងស្ទះទស្សនវិស័យអស់ដោយសារការស្តាប់យោបល់អ្នកផ្សេង។ ការស្តាប់គេច្រើនជ្រុលអាចធ្វើឱ្យខ្លួនឯងកើតជំងឺសង្ស័យលើទំនុកចិត្ត និងសមត្ថភាព។ នៅពេលមានសំឡេងច្រើនប្រាប់លោកអ្នកថា រឿងនេះត្រូវរឿងនោះខុស ខួរក្បាលលោកអ្នកនឹងបាត់បង់ពន្លឺក្នុងការពិចារណារកការពិត។
២/ យល់ច្រឡំភាពរវល់ថាជាផលិតភាព
ផលិតភាព និងភាពរវល់ជារឿងពីរខុសស្រឡះពីគ្នា។ ប៉ុន្តែមនុស្សយើងច្រើនតែយល់ច្រឡំថា ដរាបណាយើងមមាញឹក មានន័យថាយើងមានផលិតភាពច្រើន។ ការសិក្សាបង្ហាញថា ជំនឿដែលថាភាពរវល់ជាសញ្ញានៃជោគជ័យ ធ្វើឱ្យមនុស្សភ័យខ្លាចរឿងអសកម្ម។ ប៉ុន្តែពេលខ្លះដោយសារតែគិតបែបនេះទើបមនុស្សមួយចំនួនមិនខ្វល់ថា គេអាចសម្រេចផលអ្វីបាននោះទេ គ្រាន់តែធ្វើខ្លួនឯងឱ្យរវល់ទៅគ្រប់គ្រាន់ហើយ។
៣/ អូសបន្លាយពេលធ្វើកិច្ចការសំខាន់
ពាក្យមួយឃ្លាដែលគេនិយាយថា ខ្ញុំនឹងពន្យារពេលថ្ងៃស្អែក គឺជាភាសាកំប្លែងដែលក្តោបខ្លឹមសារនៃការអូសបន្លាយមិនព្រមធ្វើកិច្ចការសំខាន់ ដោយសារតែយល់ថា វាដូចជាមិនសូវបន្ទាន់ក្នុងពេលនេះ។ ប៉ុន្តែ ការអូសបន្លាយពេលវេលាច្រើនតែបង្កើតទៅជាទម្លាប់នៃការមិនព្រមទាំងកិច្ចការដែលគួរតែធ្វើនៅពេលនេះ។ បើមិនចេះពិនិត្យ និងតាមដានបញ្ហានេះទេ លោកអ្នកប្រហែលកំពុងតែបង្កើតទម្លាប់ខ្ជិល ហើយទម្លាប់នេះអាចទាញទម្លាក់ជោគជ័យទាំងអស់បាន។
៤/ អនុញ្ញាតឱ្យនយោបាយគ្របដណ្តប់ការសម្រេចចិត្ត
ការបណ្តែតបណ្តោយឱ្យនយោបាយនៅកន្លែងធ្វើការចេះតែរយីករយៀកមិនព្រមពិនិត្យកែតម្រូវជាកត្តាកំណត់ដល់ផលប៉ះពាល់អវិជ្ជមានលើជោគជ័យក្នុងមុខជំនួញ។ ការរំខានបែបនេះច្រើនតែកើតឡើងដោយសារមានសមាជិកក្នុងក្រុមការងារដណ្តើមប្រជែងអំណាចគ្នា ឬអំណួតរបស់មនុស្សម្នាក់គ្របដណ្តប់លើអំណួតរបស់អ្នកផ្សេងទៀត ជាជាងរួមគ្នាធ្វើកិច្ចការដើម្បីរីកចម្រើន។
៥/ និយាយពាក្យថា ”បាន” ចំពោះអ្វីៗទាំងអស់
ការនិយាយពាក្យថា “បាន” ចំពោះរាល់សំណើរទាំងអស់ ឬគំនិតឆ្កួតៗនឹងទាញលោកអ្នកឱ្យធ្លាក់ចូលក្នុងបញ្ហា។ ការពិតមួយក្នុងមុខជំនួញគឺលោកអ្នកមិនអាចតម្រូវចិត្តមនុស្សគ្រប់គ្នាបានទេ។ ការបង្កើតទម្លាប់ផ្គាប់ចិត្តមនុស្សច្រើនពេកអាចក្លាយជាការរំខានដ៏ធំមួយ ហើយអាចទាញទម្លាក់ជោគជ័យទាំងអស់ដែលលោកអ្នកបានបង្កើតកន្លងមក។ សូមចងចាំថា លោកអ្នកមានពេលវេលា និងធនធានល្មមត្រឹមតែផ្តោតលើគម្រោង ឬទំនាក់ទំនងណាដែលនាំលទ្ធផលជាក់ស្តែង និងសំខាន់ចំពោះលោកអ្នកតែប៉ុណ្ណោះ៕
ប្រភព ៖ Entrepreneur
0 comments:
Post a Comment