ការទទួលបានការងារល្អសព្វថ្ងៃនេះជារឿងដែលពិបាក និងមានលក្ខណៈប្រកួតប្រជែងខ្លាំង។ ដូច្នេះការស្វែងរកការងារក្នុងក្តីសុបិនកាន់តែពិបាកខ្លាំងណាស់ទៅទៀត។ ភាគច្រើននៃនិស្សិតទើបបញ្ចប់ការសិក្សាថ្មីៗដែលទទួលបានការងារក្នុងក្តីសុបិនគឺជាមនុស្សដែលមានទំនាក់ទំនងល្អឬអ្នកដែលរៀនពូកែជាងគេ។ ខាងក្រោមនេះជាគន្លឹះ៥យ៉ាងដែលនឹងជួយបង្កើនឱកាសលោកអ្នកឱ្យឆាប់ទទួលបានការងារក្នុងក្តីសុបិន៖
១/ បង្កើតប្រវត្តិរូបលម្អិតនៅលើបណ្តាញ LinkedIn
ការបង្ហាញវត្តមានវិជ្ជាជីវៈនៅលើអ៊ីនថឺណិតគឺជាជំហានសំខាន់មួយដើម្បីឈានទៅរកការងារក្នុងក្តីសុបិន។ សព្វថ្ងៃនេះ បណ្តាញសង្គមវិជ្ជាជីវៈដែលពេញនិយមបំផុតគឺ LinkedIn ។ តាមស្ថិតិបញ្ជាក់ថា អ្នកជ្រើសរើសបុគ្គលិកនិងនិយោជិតប្រើប្រាស់ LinkedIn ច្រើនជាងបណ្តាញសង្គមផ្សេងៗ។ សូមចាំថាលោកអ្នកត្រូវរៀបរាប់ជំនាញទាំងអស់ដែលបានរៀនសូត្រ និងបទពិសោធន៍ដែលធ្លាប់ឆ្លងកាត់ព្រមទាំងទំនួលខុសត្រូវទាំងអស់ដែលធ្លាប់មាន។
២/ បង្កើតបណ្តាញទំនាក់ទំនង
ក្រោយពីបង្កើតវត្តមានវិជ្ជាជីវៈនៅលើអ៊ីនថឺណិតរួចហើយ នៅមានជំហានចាំបាច់មួយទៀតក្នុងការបង្កើតទំនាក់ទំនងជាមួយអ្នកដទៃ។ ក្រៅពីបណ្តាញសង្គមទូទៅដូចជា Facebook និង Twitter ជម្រើសបន្ថែមផ្សេងទៀតក៏មានប្រសិទ្ធភាពដែរដូចជាការិយាល័យរកការងាររបស់មហាវិទ្យាល័យ និងការិយាល័យរកការងារសាធារណៈជាដើមដែលសុទ្ធតែជាកន្លែងជួបគ្នារវាងអ្នករកបុគ្គលិកនឹងអ្នករកការងារធ្វើ។
៣/ ធ្វើកម្មសិក្សាឱ្យបានឆាប់
អាថ៌កំបាំងមួយទៀតដើម្បីទទួលបានការងារក្នុងក្តីសុបិនគឺសមត្ថភាពរបស់លោកអ្នកក្នុងការប្តេជ្ញាចិត្ត។ ហើយមធ្យោបាយល្អបំផុតដើម្បីសម្តែងការប្តេជ្ញាចិត្តគឺកម្មសិក្សានៅតាមស្ថាប័នការងារដែលលោកអ្នកពេញចិត្ត។ ក្រុមហ៊ុនធំៗភាគច្រើនមិនជួលមនុស្សទើបបញ្ចប់ការសិក្សាភ្លាមៗទេ ប៉ុន្តែគេនឹងពិចារណាផ្តល់ឱកាសឱ្យលោកអ្នកធ្វើកម្មសិក្សា។
៤/ ស្វែងរកអ្នកណែនាំល្អ ឬធ្វើខ្លួនជាអ្នករៀនសូត្រធ្វើការល្អ
ការទទួលបានអ្នកណែនាំការងារល្អជួយបានច្រើនណាស់។ ម្តាយឪពុក បងប្អូន គ្រូ និងមនុស្សផ្សេងទៀតអាចជាអ្នកណែនាំការងាររបស់លោកអ្នក។ ប៉ុន្តែដើម្បីឈានទៅដល់គោលដៅឱ្យបានឆាប់ លោកអ្នកគួរតែស្វែងរកអ្នកណែនាំការងារវិជ្ជាជីវៈក្នុងវិស័យដែលលោកអ្នកចូលចិត្ត។ បន្ថែមពីលើនេះ ត្រូវព្យាយាមអានសៀវភៅជំនាញក្នុងវិស័យដែលលោកអ្នកពេញចិត្តឱ្យបានច្រើន។
៥/ រៀនជំនាញក្នុងវិស័យដែលលោកអ្នកចង់ធ្វើការ
និស្សិតជាច្រើនគិតថាមេរៀនក្នុងមហាវិទ្យាល័យតែម្យ៉ាងអាចជួយគេឱ្យទទួលបានការងារក្នុងក្តីសុបិន។ ប៉ុន្តែសង្គមការងារជាក់ស្តែងតម្រូវឱ្យមានចំណេះនិងជំនាញលើសពីអ្វីដែលរៀននៅមហាវិទ្យាល័យ។ ដើម្បីបញ្ជៀសចំណុចខ្វះខាតពេលប្រលូកក្នុងពិភពការងារជាក់ស្តែង លោកអ្នកគួរស្វែងរករៀនវគ្គជំនាញឱ្យបានច្រើនដែលផ្តោតចំៗនិងលម្អិតជាងមេរៀនទូទៅនៅមហាវិទ្យាល័យ៕
ប្រភព ៖ Entrepreneur
0 comments:
Post a Comment