ក្រុមហ៊ុនល្បីឈ្មោះធំៗដូចជា McDonalds Lexus និង Coca Cola ជាដើមមានគេស្គាល់ច្រើនស្ទើរគ្រប់ទីកន្លែង។ មិនមែនរសជាតិ គុណភាព ឬសេវាកម្មតែម្យ៉ាងដែលធ្វើឱ្យមនុស្សស្គាល់និងគាំទ្រឈ្មោះក្រុមហ៊ុនទាំងនោះទេ ប៉ុន្តែក្រុមហ៊ុនទាំងនោះផ្តល់ឱ្យអតិថិជននូវអារម្មណ៍ទុកចិត្ត និងចេះផ្តល់តម្លៃឱ្យអតិថិជនវិញ។ ដើម្បីកំណត់អត្តសញ្ញាណសម្រាប់ឈ្មោះក្រុមហ៊ុនលោកអ្នក សូមពិចារណាសំណួរទាំងនេះ៖
១/ តើមនុស្សមកក្រុមហ៊ុនលោកអ្នកស្តាប់ឮអ្វីខ្លះ?
តើមានបទភ្លេងអ្វីក្នុងក្រុមហ៊ុនរបស់លោកអ្នកដែលទាក់ទាញមនុស្សតាមវ័យណាមួយឬទេ? ហើយតើបទភ្លេងទាំងនោះធ្វើឱ្យរំខានដល់មនុស្សក្នុងវ័យផ្សេងទៀតទេ? តើមានសម្លេងខ្លាំងពេកទេសម្រាប់មនុស្សដែលត្រូវការស្ងៀមស្ងាត់? ហើយតើមនុស្សដែលត្រូវការភ្លេងកំដរមានអ្វីស្តាប់ដើម្បីបន្ធូរអារម្មណ៍តានតឹងទេ? មនុស្សជាច្រើនធ្លាប់មានបទពិសោធន៍ដើរចេញពីភោជនីយដ្ឋានដោយសារមានសម្លេងលាន់ឮខ្លាំងពេក ឬស្ងៀមស្ងាត់ពេក។ សូមដឹងឱ្យប្រាកដថាលោកអ្នកអាចគ្រប់គ្រងសម្លេងបានក្នុងកម្រិតមួយដែលស័ក្តសមនឹងកេរ្តិ៍ឈ្មោះហាងរបស់លោកអ្នក។
២/ តើមនុស្សមើលឃើញអ្វីខ្លះ?
តើគេហទំព័រ ឬការិយាល័យរបស់លោកអ្នកមើលទៅបុរាណពេកទេ? តើលោកអ្នកប្រើប្រាស់ពណ៌សមរម្យទេក្នុងការរចនាគេហទំព័រ ជញ្ជាំង ឬឯកសណ្ឋានរបស់លោកអ្នក? ប្រទេសនិងតំបន់នីមួយៗមានពណ៌ពិសេសដែលគេពេញនិយម សូមរកមើលតាមអ៊ីនថឺណិតប្រសិនបើលោកអ្នកមិនដឹងច្បាស់។ វាមិនមែនសម្រាប់លោកអ្នកទេ តែសម្រាប់មនុស្សដែលលោកអ្នកចង់ទាក់ទាញ។ តើមនុស្សដែលដើរចូលមកការិយាល័យ ឬក្រុមហ៊ុនរបស់លោកអ្នកមើលឃើញអ្វីមុនគេ? តើបុគ្គលិកជួរមុខរបស់លោកអ្នកដែលអតិជនមើលឃើញមុនគេនោះមានរបៀបរៀបរយនិងរាក់ទាក់ភ្ញៀវទេ? តើកន្លែងលោកអ្នកមានពន្លឺគ្រប់គ្រាន់ទេ? ដូចគ្នានេះដែរ សម្រាប់គេហទំព័រ តើផ្ទៃខាងក្រោយមានពណ៌ទាក់ទាញអ្នកមើលទេ?
៣/ តើក្រុមហ៊ុនមានផ្តល់រសជាតិអ្វីខ្លះ?
លោកអ្នកប្រហែលគិតថាចំណុចត្រង់នេះទាក់ទងតែកន្លែងលក់អាហារប៉ុណ្ណោះ ប៉ុន្តែមិនមែនដូច្នោះទេ។ មានអ្នកស្រាវជ្រាវមួយក្រុមបានយកទឹកដូចគ្នាទៅចាក់ចូលដប៣ផ្សេងគ្នា ដែលក្នុងនោះដបពីមានស្លាកឈ្មោះក្រុមហ៊ុនល្បី ហើយដបមួយទៀតមានឈ្មោះក្រុមហ៊ុនដែលគេប្រឌិតឡើង។ នៅពេលគេឱ្យមនុស្សមួយក្រុមភ្លក់ទឹកទាំង៣ដបនោះ ម្នាក់ៗបានអះអាង និងផ្តល់មូលហេតុស្រដៀងគ្នាថាទឹកក្នុងដបដែលមានស្លាកឈ្មោះក្រុមហ៊ុនល្បីមានរសជាតិប្រសើរជាងទឹកក្នុងដបដែលមានស្លាកឈ្មោះក្រុមហ៊ុនមិនមានអ្នកស្គាល់។ តាមពិតទឹកបីដបនោះមានប្រភពតែមួយ គឺទឹកដូចគ្នាទេ ប៉ុន្តែគឺស្លាកឈ្មោះក្រុមហ៊ុនដែលធ្វើឱ្យអ្នកភ្លក់ទឹកសម្រេចចិត្តថាខុសគ្នា។
៤/ តើអតិថិជនធុំក្លិនអ្វីខ្លះ?
មានការសិក្សាស្រាវជ្រាវជាច្រើនទាក់ទងនឹងក្លិន និងរបៀបដែលក្លិនជះឥទ្ធិពលលើអថិជនដោយមិនដឹងខ្លួន។ ហេតុដូច្នេះហើយបានគេមានអ្នកខ្លះធុំក្លិនម្ហូបចេញពីហាងល្បីសូម្បីតែគេនៅឆ្ងាយពីកន្លែងចម្អិននោះក៏ដោយ។ នេះក៏ជាមូលហេតុមួយដែរ នៅពេលលោកអ្នកចូលទៅហាងលក់ទំនិញ ឬការិយាល័យក្រុមហ៊ុនណាមួយ លោកអ្នកតែងតែធុំក្លិនអ្វីពិសេសមួយ។ តើមានក្លិនអ្វីមួយដែលលោកអ្នកអាចទាក់ទាញចិត្តអតិថិជនមិនឱ្យដឹងខ្លួនបានទេ? ឃានវិញ្ញាណរបស់មនុស្សមានអាយុកាលយូរអង្វែង ហើយបង្កប់នូវការចងចាំបានយូរបំផុត។ ហេតុដូច្នេះហើយ បើមិនទានរកឃើញក្លិនដែលអាចទាក់ទាញអតិថិជនបាន សូមប្រុងប្រយ័ត្នកុំឱ្យមានក្លិនមិនល្អឱ្យសោះ។ ចំណែកមនុស្សដែលមិនចូលចិត្តសត្វចិញ្ចឹមដូចជាឆ្កែ និងឆ្មាជាដើមអាចនឹងមានប្រតិកម្មពេលធុំក្លិនសត្វទាំងនោះបានយ៉ាងរហ័ស។
៥/ តើអតិថិជនមានអារម្មណ៍ដូចម្តេច?
តើកន្លែងរបស់លោកអ្នកស្អាត ឬកខ្វក់? ហើយបន្ទប់ទឹកយ៉ាងម៉េចដែរ? ជាទូទៅមនុស្សស្រីឆាប់វាយតម្លៃលើភាពស្អាតបាតក្នុងកន្លែងទាំងនេះណាស់។ ហើយនៅពេលដែលអ្នកទទួលភ្ញៀវរបស់លោកអ្នកទទួលស្វាគមន៍អតិថិជនដោយបើកមាត់ស្ទើរមិនចង់រួច តើលោកអ្នកគិតថាភ្ញៀវគេពេញចិត្តនឹងមកលើកក្រោយទៀតទេ? នៅពេលលោកអ្នកមិនព្រមឆ្លើយតបសំណួរ ឬចម្ងល់របស់អតិថិជនក្នុងរយៈពេលជាង២ថ្ងៃ តើទង្វើនោះធ្វើឱ្យអតិថិជនយល់ថាគេមានតម្លៃទេ? បើជួបអតិថិជនប្រចាំរបស់លោកអ្នកក្នុងទីសាធារណៈ តើលោកអ្នកចំណាំគេបានទេ? បើលោកអ្នកអាចធ្វើឱ្យអតិថិជនមានអារម្មណ៍ថាខ្លួនគេពិសេសកាន់តែខ្លាំង គេនឹងជឿទុកចិត្តនិងស្ម័គ្រស្មោះចំពោះក្រុមហ៊ុនលោកអ្នកកាន់តែខ្លាំងដូចគ្នា៕
ប្រភព ៖ Entrepreneur
0 comments:
Post a Comment