ភាពជោគជ័យក្នុងជីវិតសហគ្រិនត្រូវការប្រឹងប្រែងខ្លាំងមិនរាថយដោយសារមិនមានទេវតាណានាំយកទឹកមន្តជោគជ័យមកឱ្យបុគ្គលណាមួយដែលដេកចាំតែសំណាងនោះទេ។ សហគ្រិនជោគជ័យភាគច្រើនដើរតាមមាគ៌ាស្រដៀងគ្នានិងមានអត្តចរិតប្រហាក់ប្រហែលគ្នា។
ខាងក្រោមនេះជាចំនុចមួយចំនួនដើម្បីពិចារណា ប្រសិនបើលោកអ្នកចង់បង្កើតមុខជំនួញដោយខ្លួនឯង៖
១/ ស្រឡាញ់អ្វីដែលអ្នកធ្វើ
ឆន្ទៈជាចង្កូតក្នុងការតម្រង់ទិសដៅយុទ្ធសាស្រ្តមុខជំនួញឱ្យទៅមុខជានិច្ច។ បើការប្រឹងប្រែងមិនពេញលេញនោះ សហគ្រិនមិនងាយសម្រេចបានជោគជ័យឡើយ។ លោក Abraham Lincoln ធ្លាប់បរាជ័យច្រើនបំផុតក្នុងជីវិត ប៉ុន្តែលោកមិនបោះបង់ការព្យាយាមម្តងណាឡើយ រហូតដល់ទីបំផុតបានក្លាយជាប្រធានាធិបតីគំរូមួយរូបរបស់សហរដ្ឋអាមេរិក។
២/ បោះមួយជំហានម្តង
រៀនរត់មុនពេលចេះដើរមិនអាចទៅរួចទេ។ ការគ្រប់គ្រងហានីភ័យគឺជាកត្តាចាំបាច់មួយក្នុងពេលចាប់ផ្តើមមុខជំនួញថ្មី។ ដូច្នេះហើយត្រូវចេះរៀនស្គាល់តុល្យភាពក្នុងដំណើររបស់ខ្លួនដើម្បីឱ្យដឹងថាតើលោកអ្នកអាចបោះជំហានបានធំប៉ុណ្ណា។
៣/ រៀនសូត្រពីអ្នកដទៃ
សហគ្រិនជោគជ័យច្រើនតែធ្វើការឱ្យអ្នកដទៃមុនពេលចាប់ផ្តើមអាជីវកម្មផ្ទាល់ខ្លួន។ ការចំណាយពេលពីរបីឆ្នាំដើម្បីក្រេបជញ្ជក់យកបទពិសោធន៍ពីបុគ្គលគំរូនឹងជួយបង្កើតបានមូលដ្ឋាននៃចំណេះនិងជំនាញក្នុងការចាប់ផ្តើមមុខជំនួញរបស់លោកអ្នក។ សូម្បីតែបរាជ័យរបស់អ្នកដទៃក៏អាចជាមេរៀនបានដែរប្រសិនបើលោកអ្នកយកវាមករិះគិតរកដំណោះស្រាយបាន។
៤/ កុំនៅទំនេរស្ងៀម
សហគ្រិនជាមនុស្សដែលមិនចេះនៅស្ងៀម។ គេមិនអាចនៅអង្គុយស្ងៀមវិភាគវែកញែកបញ្ហាគ្រប់ចំណុចនោះទេ។ គ្មានកន្លែងសម្រាប់ការអូសបន្លាយពេលវេលាទេក្នុងការចាប់ផ្តើមអាជីវកម្ម។ ក្រោយពីពិនិត្យមើលរាល់ជំហានដែលត្រូវដើររួចមក លោកអ្នកមិនត្រូវបង្អង់ពេលចាប់ផ្តើមឡើយ។ សូមជឿជាក់លើអារម្មណ៍ខ្លួនឯង។
៥/ បង្កើតផែនការ
ព្យាយាមអានស្វែងយល់រឿងរ៉ាវអាជីវកម្មជោគជ័យ។ សូមស្រូបជញ្ជក់យកចំណេះដឹងដែលសហគ្រិនជោគជ័យបានបន្សល់ទុកឱ្យដូចជាលោក Jack Ma លោក Steve Jobs និងលោក Bill Gates ជាដើម។ ផែនការពាណិជ្ជកម្មជោគជ័យមិនចាំបាច់ទាល់តែសរសេរចេញជាសៀវភៅនោះទេ។
៦/ ការចាប់ផ្តើមមិនដែលហួសពេលទេ
សហគ្រិនជោគជ័យជាច្រើននាក់ចាប់ផ្តើមនៅក្នុងពេលពាក់កណ្តាលឬពេលជ្រេនៃជីវិត ដូចជាលោកស្រី J. K. Rowling អ្នកនិពន្ធសៀវភៅរឿង Harry Potter លោក Sam Walton ស្ថាបនិកបណ្តាញផ្សារទំនើប Wal-Mart និងលោក Colonel Sanders ស្ថាបនិកភោជនីយដ្ឋាន KFC ជាដើម។
៧/ យកចិត្តទុកដាក់គ្រប់ពេលលើឥរិយាបថ
ឥរិយាបថរបស់ស្ថាបនិកស្ថាប័នជាកញ្ចក់ឆ្លុះបញ្ចាំងនូវក្រមសីលធម៌របស់មុខជំនួញដែលគេបង្កើតឡើង។ គំនិតអវិជ្ជមាន ភាពខ្ជិលច្រអូស និងការខ្ជីខ្ជាពេលវេលានិងលុយឥតប្រយោជន៍នឹងធ្វើឱ្យខូចកេរ្តិ៍ឈ្មោះ។ ការប្រឈមនឹងឧបសគ្គមិនចេះព្រមរាថយជាកត្តាកំណត់ភាពជោគជ័យរបស់អ្នកដឹកនាំមុខជំនួញ៕
ប្រភព ៖ Entrepreneur
0 comments:
Post a Comment